ඊශ්‍රායල් රැකියා වැඩි කරගැනීමේ සියළු වගකීම් ශ්‍රමිකයින් සතුයි – ඊශ්‍රායල් තානාපති නිමල් බණ්ඩාර
- Sujeewa Senerath
- March 7, 2025
- පුවත්, සංචාරක සහ චාරිකා
- 0 Comments
-
මත්ද්‍රව්‍ය ජාවාරම්කරුවන්ට හසුවී ජීවිතය විනාශ කරගන්න එපා…
වෙනත් රටවල මෙන් ඊශ්‍රායලයේ ද මත්පැන් වෙළඳාම සිදුවන අතර, එරට නීතියෙන් තහනම් නිතිවිරෝධි මත්ද්‍රව්‍ය ලබාගැනීමේ ඉඩක් පවතින බැවින්, එරට වෙසෙන ඇතැම් ශ්‍රී ලාංකිකයන් නිතිවිරෝධි මත්ද්‍රව්‍යවලට ඇබ්බැහි වී සිටින බවත්, ඊශ්‍රායලයේ ශ්‍රී ලංකා තානාපති නිමල් බණ්ඩාර මහතා පවසයි.
ඊශ්‍රායලයේ වෙසෙන ශ්‍රී ලාංකිකයන් සුලු පිරිසක් ෆේස්බුක් හා වට්ස්ඇප් ඔස්සේ විවිධ සමූහ නිර්මාණය කරගනිමින් කල්ලි කණ්ඩායම් ඇති කරගෙන ඇති බවත්, එමගින් විවිධ පහසුකම් ඉල්ලා උද්ගෝෂණය හා වැඩවර්ජන සංවිධානය කරන බවත් පැවසීය. එවැනි ක්රියාමාර්ග නිසා ශ්‍රී ලාංකිකයන් ශ්‍රමිකයින් සම්බන්ධයෙන් ඇති යහපත් ප්‍රතිරූපය විනාශ වන බවත් පැවසූ තානාපතිවරයා ශ්‍රී ලාංකිකයට වැඩි රැකියා ලබාගැනීම හෝ රැකියා අවස්ථා අහිමි කරගැනීමේ සම්පූර්ණ වගකීම ඇත්තේ ශ්‍රමිකයින් සතුව බවත් ප්රකාශ කළේය. එසේම රැකියා ස්ථාන වෙනස් කිරීම නිසා වීසා අහිමිවීමේ අවධානමක් පවතින බව පෙන්වාදුන් නිමල් බණ්ඩාර මහතා එවැනි සිදුවීම් නිරන්තරයෙන් වාර්තාවීම හේතුවෙන් ගැටළු රැසක් උද්ගතවී ඇති බවද ප්රකාශ කළේය.
එබැවින් ඊශ්‍රායල් රැකියා සඳහා පැමිණෙන සියළු ශ්‍රී ලාංකිකයන්, තම රැකියාව නීතිගරුකව සිදුකරමින් දෙරටේ ගෞරවය ආරක්ෂා කළ යුතු බවද පෙන්වා දුන්නේය. ශ්‍රී ලාංකිකයන්ගේ ගැටළු පිළිබඳව තානාපති කාර්යාලය මගින් නිරන්තරව සොයාබලන බවද ඔහු වැඩිදුරටත් සඳහන් කළේය.
ඊශ්‍රායලයේ ඉදිකිරීම් රැකියා හිමිවූ ශ්‍රී ලාංකිකයන් 217 දෙනෙකු උදෙසා ඊයේ දින (2025.03.06) පැවති අවසන් රැස්වීම සඳහා මාර්ගගත ක්රමවේදය ඔස්සේ සම්බන්ධ වෙමින් තානාපතිවරයා මේ බව ප්රකාශ කළේය. රැකියා හිමිවූ මෙම පිරිස මාර්තු මස 10 හා මාර්තු මස 25 යන කාලය තුළදි මෙරට ඊශ්‍රායලය බලා පිටත්ව යාමට නියමිතය.
මේ අතර, ශ්‍රී ලාංකිකයන් 6096 දෙනෙකු සඳහා ඊශ්‍රායලය ඉදිකිරීම් රැකියා අවස්ථා හිමිවී ඇති අතර, 2025 වසරේ ජනවාරි සිට මේ දක්වා ගතවූ කාලය තුළ ලාංකිකයින් 1018 දෙනෙකු ඊශ්‍රායලය ඉදිකිරීම් රැකියා සඳහා පිටත්ව ගොස් තිබේ.
