චමල් සංජීවගෙන් සීඅයිඩීය ප්‍රකාශ ගනියි
- CNL Reporter
- April 5, 2025
- දේශපාලන
- චමල් සංජීව
- 0 Comments
රාජ්‍ය ඖෂධ සංස්ථාවේ පසුගිය වසරේ දී සිදුවූ ආන්දෝලනාත්මක ‘ක්ලොහෙක්සිඩීන්’ විසබීජ නාශක මුඛ සෝදන ද්‍රාවණ ටෙන්ඩරයක් සම්බන්ධයෙන් සිදුකළ පැමිණිල්ලකට අදාළව අපරාධ පරීක්ෂණ දෙපාර්තමේන්තුව පසුගියදා විශේෂඥ වෛද්‍ය චමල් සංජීව මහතාගෙන් පැය හතක දීර්ඝ ප්‍රකාශයක් ලබාගෙන ඇත.
2020 වසරේ සිට මේ වසරේ මාර්තු මාසය දක්වා කාලයේදී රාජ්‍ය ඖෂධ සංස්ථාව තුළ සිදුවූ ප්‍රශ්නගත ටෙන්ඩර් ගනුදෙනු සම්බන්ධව මෙහිදී වෛද්‍යවරයා අපරාධ පරීක්ෂණ දෙපාර්තමේන්තුව හමුවේ තොරතුරු ලබාදී ඇත.
විගණකාධිපතිවරයාගේ උපදෙස්වලට අනුව ලබාදෙන නිර්දේශ නොසලකා හරිමින් අත්තනෝමතික ලෙස රාජ්‍ය ඖෂධ සංස්ථාව දිගින් දිගට ම කටයුතු කර ඇති බව සාක්ෂි සහිතව පෙන්වා දුන් බවත් වෛද්‍යවරයා මූල්‍යමය වශයෙන් අසාධුලේඛනගත කරන ලද සමාගමක් ප්‍රසම්පාදන ක්‍රියාවලියට ඇතුළත් වීම ම ගැටලු සහගත වන බවත් වෛද්‍ය චමල් සංජීව මහතා සඳහන් කරයි.
රාජ්‍ය අංශයේ ආයතනවල දූෂණ, වංචා, අක්‍රමිකතා හෙළි කරන නිලධාරීන් සහ තොරතුරු බාහිරට යන ක්‍රමවේදයන් සම්බන්ධව පරීක්ෂණ සිදුකරනවා වෙනුවට එම දූෂණ, වංචා, අක්‍රමිකතා සිදුකරමින් වැරදි වසා ගැනීමට අසත්‍ය තොරතුරු හෙළි රකන රාජ්‍ය අංශය දැනට සේවය කරන සංස්ථා සභාපතිවරුන් ඇතුළු නිලධාරීන්ට එරෙහිව නීතිය ක්‍රියාත්මක නොකරන්නේ මන්දැයි විශේෂඥ වෛද්‍ය චමල් සංජීව මහතා අපරාධ පරීක්ෂණ දෙපාර්තමේන්තුව හමුවේ පවසා ඇත.
සුජීව තත්සර
