දැඩි රස්නෙට දරුවන් දවසට දෙවරක් නාවන්න – ළමා රෝග විශේෂඥ වෛද්‍ය දීපාල් පෙරේරා
- CNL Reporter
- April 2, 2025
- පුවත්
- වෛද්‍ය දීපාල් පෙරේරා
- 0 Comments
වතුර ලීටරයක්වත් බොන්න දෙන්න
පවතින අධික රස්නය සමග දරුවන් දවසකට දෙවරක්වත් නෑම සුදුසු බවත් එසේම දරුවන් දිනකට ජලය ලීටරයක්වත් පානය කිරීම ඉතා සුදුසු බවත් බොරැල්ල රිජ්වේ ආර්යා ළමා රෝහලේ ළමා රෝග විශේෂඥ වෛද්‍ය දීපාල් පෙරේරා මහතා ‘දිවයින’ට ඊයේ (01දා) පැවැසීය.
පවතින අධික රස්නය සමග ජලය පානය කිරීම අඩු කළහොත් දරුවන් විජලනය තත්ත්වයන්ට පත්විය හැකි බවද හෙතෙම කීය.
තවදුරටත් කතා කළ ළමා රෝග විශේෂඥ වෛද්‍ය දීපාල් පෙරේරා මහතා මෙසේද කියා සිටියේය.
“පවතින රස්නය සමග දරුවන්ට හිසරදය, වමනය යෑම, ක්ලාන්තය, සිහි මුර්ඡාව, තාප කම්පන තත්ත්වයන්, විජලන තත්ත්වයන් ඇතිවෙන්න පුළුවන්. ඒ වගේම හමේ රෝග, දද, කුෂ්ඨ, බිබිළි එන්න පුළුවන්. මේ නිසා දවසකට දෙපාරක්වත් දරුවන්ව නහවන්න. අඩුම තරමින් විනාඩි 20ක්වත්. ඒ වගේම ජලය ලීටරයක්වත් දරුවන් පානය කිරීම වැදගත්. දරුවන් රැගෙන අව්වේ ගමන් බිමන් යනවා නම් තොප්පියක්වත් පලඳවන්න.
“ඒ වගේම, මේ දවස්වල දරුවන්ට කැඳ, ජීවනී, සුප් වර්ග වගේ ස්වාභාවික දියර වර්ග, ගස්ලබු, කජු පුහුලන්, අඹ, ජම්බු වගේ පලතුරු වර්ගත් දරුවන්ට දෙන්න.
ප්‍රදීප් ප්‍රසන්න සමරකෝන්
