“ප්‍රාථමික සෞඛ්‍ය සේවා පද්ධති වැඩිදියුණු කිරීමේ ව්‍යාපෘතිය” නිල වශයෙන් ආරම්භ වේ
- Sujeewa Senerath
- March 30, 2025
- ආයෝජන, පුවත්
- primary-health-care-srilanka
- 0 Comments
මෙරට සිදුවන සමස්ත මරණ සංඛ්‍යාවෙන් ප්‍රතිශතයක් ලෙස 83% ක් බෝනොවන රෝග නිසා ඇතිවන මරණ බවට සෞඛ්‍ය දත්ත අනාවරණය කරන බවත්, එම දත්තවලට අනුව අවුරුදු 60 වඩා වැඩි ජනතාවගෙන් 35% අධි රුධිර පීඩනයෙන් පෙළෙන බව ද , ඒ අතරින් අධි රුධිර පීඩනයෙන් පෙළෙන බව නොදැනීම හේතුවෙන් වාර්ෂික ව හැටදහසකට ආසන්න සංඛ්‍යාවක් ආඝාතයට ගොදුරු වන බවද, ඒ අතරින් හාරදහසකට ආසන්න සංඛ්‍යාවක් වාර්ෂික ව මියයාමට හෝ ආබාධිත තත්ත්වයන්ට පත්වන බව ද, සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා ප්‍රකාශ කළේ ය. වැඩිදුරටත් අදහස් දැක් වු අමාත්‍යවරයා මෙරට වැඩිහිටි ජනගහනයෙන් 20% ක් දියවැඩියාවෙන් පෙළෙන බවත්, එම පිරිසෙන් 41% ක ප්‍රමාණයක් ප්‍රතිකාර ලබා නොගන්නා බව ද, පැවසී ය.
සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා මෙම කරුණූ අනාවරණය කළේ මෙරට ප්‍රාථමික සෞඛ්‍ය සේවා පද්ධතියේ ගුණාත්මකභාවය හා ප්‍රවේශය වැඩි දියුණු කිරීම අරඹයා ලෝක බැංකුවේ මූල්‍යාධාර මත ක්‍රියාත්මක කිරීමට නියමිත “ප්‍රාථමික සෞඛ්‍ය සේවා පද්ධති වැඩිදියුණු කිරීමේ ව්‍යාපෘතිය” නිල වශයෙන් ආරම්භ කිරීම වෙනුවෙන් පසුගිය දා කොළඹ City Of Dreams හෝටලයේ දී පැවති සමාරම්භක උත්සවයට ප්‍රධාන ආරාධිත අමුත්තා වශයෙන් එක් වෙමිණි.
ලෝක බැංකු ආධාර සහ මෙරට රජයේ මූල්‍යාධාර මත ක්‍රියාත්මක වන මෙම ව්‍යාපෘතිය සදහා වැය කිරීමට අපේක්ෂිත මුදල රුපියල් බිලියන 50 කි. වසර පහක කාල පරිච්ඡේදය තුළ ක්‍රියාත්මක කිරීමට නියමිත මෙම ව්‍යාපෘතිය මගින් මෙරට සියලු ම දිස්ත්‍රික්කයන් ආවරණය වන පරිදි ප්‍රාථමික සෞඛ්‍ය සේවා පද්ධතිය සංවර්ධනය කිරීම හා නවීකරණය කිරීමට අපේක්ෂිත ය.
ඒ අනුව මෙම ව්‍යාපෘතිය මගින් මෙරට ස්ථාපිත ප්‍රාථමික සෞඛ්‍ය සේවා පද්ධති වැඩිදියුණු කිරීමේ ව්‍යාපෘතිය මගින් මෙරට ස්ථාපිත ප්‍රාථමික සෞඛ්‍ය සත්කාර ඒකක 1150 කට ආසන්න ප්‍රමාණයකින් 600 ක ප්‍රමාණයක යටිතල පහසුකම් සංවර්ධනය කිරීමට කටයුතු කරන අතර, එම ඒකකවලට සෞඛ්‍ය වෛද්‍ය උපකරණ ලබා දීම, කාර්ය මණ්ඩල ධාරිතාවය වැඩිකිරීම, විද්‍යුත් රෝගී ලියාපදිංචිය, ප්‍රමුඛ දත්ත වාර්තා ක්‍රමවේදයක් හදුන්වා දෙමින් එය ක්‍රියාත්මක කිරීම, මහජන සෞඛ්‍ය පරීක්ෂකවරුන්ට සහ පවුල් සෞඛ්‍ය සේවා නිලධාරින්යන්ට යතුරුපැදි ලබා දීම, පළාත්වල ස්ථාපිත සෞඛ්‍ය කාර්යමණ්ඩල පුහුණු මධ්‍යස්ථානවල භෞතික සම්පත් සංවර්ධනය කිරීම, පුහුණු මධ්‍යස්ථාන නොමැති පළාත් සඳහා නව පුහුණු මධ්‍යස්ථාන ඉදි කිරීම, ඖෂධ ප්‍රවාහනය සදහා ලොරි රථ 10 ක් ලබා ගැනීම, ඖෂධ ගබඩාකිරීම සදහා නවීන තාක්ෂණයෙන් යුත් නව ඖෂධ ගබඩා 10 ක් අවශ්‍යතාවය පරිදි අලුතින් ඉදිකිරීම, යාපනය ප්‍රදේශයේ දූපත්වල වෙසෙන ජනතාවගේ ප්‍රයෝජනය සදහා රුපියල් කෝටි 06ක වටිනාකමකින් යුත් ගිලන්රථ බෝට්ටුවක් ලබා දීම, සෞඛ්‍ය වෛද්‍ය නිලධාරී කාර්යාල සදහා අවශ්‍යතාවය පරිදි කැබ් රථ 35 ක් ලබා දීම සහ පළාත් පුහුණු මධ්‍යස්ථානවල සෞඛ්‍ය කාර්යමණ්ඩල ප්‍රවාහන පහසුකම් සදහා බස්රථ ලබා දීම යන සංවර්ධන කටයුතු සිදු කිරීමට නියමිත ය.
මෙහි දී වැඩිදුරටත් අදහස් දැක් වු සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා මෙරට රජයේ රෝහල් සහ සෞඛ්‍ය ආයතනවල රෝගී ප්‍රතිකාර සේවාවන් සඳහා වෛද්‍යවරුන් 24000 ක් පමණ සේවයේ යොදවා ඇති බවත්, ඉන් වෛද්‍යවරුන් 2587 ක් ප්‍රාථමික සෞඛ්‍ය සත්කාර ඒකකවලට අනුයුක්තව මහඟු රෝගී සත්කාරක සේවාවක් ඉටු කරන බව ද, පැවසී ය.
වසර 2040 වන විට මෙරට හතර දෙනෙකුගෙන් එක් අයකු අවුරුදු 60 වැඩි වැඩිහිටි පුද්ගලයෙකු වන බවට සෞඛ්‍ය අංශ අනුමාන කර තිබෙන බවත්, ඒ හේතුවෙන් ප්‍රාථමික සත්කාර, සහන සහ පුනරුත්ථාපන ප්‍රතිකාර සදහා නව ප්‍රවණතාවයක් නිර්මාණය වන බව ද සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා මෙහි දී වැඩිඳුරටත් සඳහන් කළේ ය.
රෝගී තත්ත්වය පදනම් කරගත් ප්‍රතිකාර ක්‍රමයක් වෙනුවට පුද්ගලයා පදනම් කරගත් ප්‍රතිකාර ක්‍රමයක් දියත් කිරීම මෙම නව ව්‍යාපෘතියේ අරමුණක් වන අතර ජනගහනය 20000 ක් ආවරණය වන පරිදි ප්‍රාථමික සෞඛ්‍ය සත්කාර ඒකකයකට රෝගී සත්කාර සේවාවන් සදහා එම ජනතාව යොමු කරවන නව ක්‍රමවේදයක් මෙම ව්‍යාපෘතියෙන් හඳුන්වා දීමට ද නියමිතය.
නව රජයේ ප්‍රතිපත්තියට අනූව මෙරට 5000 ක ජනතාවකට එක් ප්‍රාථමික සෞඛ්‍ය සත්කාර ඒකකයත් බැගින් ඇති කිරීමේ නව වැඩපිළිවෙළට මෙම ව්‍යාපෘතියේ සහයෝගය ද, ඉදිරියේ දී ලබාගත හැකි බවත්, එ මඟින් තම බල ප්‍රදේශයේ ජනතාවට ප්‍රතිකාර, සෞඛ්‍ය අධ්‍යපනය සහ අනෙකුත් සේවාවන් ලබා දෙන වෛද්‍යවරයෙක්, මහජන සෞඛ්‍ය හෙද නිලධාරිනියක් ඇතුළු සෞඛ්‍ය කාර්ය මණ්ඩලය අනුයුක්ත කිරීමට ද සෞඛ්‍ය අමාත්‍යාංශය මේ වන විට අදහස් කර ඇති බව ද අමාත්‍යවරයා වැඩිදුරටත් අනාවරණය කළේ ය.
මෙහි දී ප්‍රාථමික සෞඛ්‍ය සේවා පද්ධති වැඩිදියුණු කිරීමේ ව්‍යාපෘතියට අඳාළ වෙබ් පිටුව ද අමාත්‍යවරයාගේ ප්‍රධානත්වයෙන් එළිදැක්වීමට ද පියවර ගන්නා ලදී.
මෙම අවස්ථාවට සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ, සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන, අධ්‍යක්ෂ (ප්‍රාථමික සත්කාර) විශේෂඥ වෛද්‍ය සරත්චන්ද්‍ර කුමාරවංශ, ලෝක සෞඛ්‍ය සංවිධානයේ මෙරට නියෝජිත ආචාර්ය අලාකා සිං, ලෝක බැංකුවේ ශ්‍රී ලංකා ,මාලදිවයින රටවල කළමණාකරු ගෙවෝර්ග් සර්ග්ස්යාන් (gevorg sargsyan), පළාත් සෞඛ්‍ය ලේකම්වරුන්, ප්‍රාථමික සෞඛ්‍ය සේවා පද්ධති වැඩිදියුණු කිරීමේ ව්‍යාපෘති අධ්‍යක්ෂ ඉංජිනේරු ලලිත් ලියනගේ, මුදල් කොමිෂන් සභාවේ සභාපති සුමිත් අබේසිංහ, යන මහත්වරුන් මෙන්ම සෞඛ්‍ය හා ජනමාධ්‍ය අමාත්‍යාංශයේ අතිරේක ලේකම්වරුන්, නියෝජ්‍ය අධ්‍යක්ෂ ජනරාල්වරුන්, පළාත් සෞඛ්‍ය සේවා අධ්‍යක්ෂවරුන්,ප්‍රාදේශීය සෞඛ්‍ය සේවා අධ්‍යක්ෂවරුන් ඇතුළු නිලධාරීන් පිරිසක් සහභාගී වූහ.
(photo-aljazeera)
