පිරමීඩ හොරුන්ට හසු වෙන්න එපා
- 5opn1
- January 28, 2025
- පුවත්
- පිරමීඩ හොරුන්ට හසු වෙන්න එපා
- 0 Comments
ඩිරෙක්ට් මාර්කටින්වලදී මෙන් භාණ්ඩ විකිණීමට යැයි පවසා අලුතින් සාමාජිකයන් බඳවා ගන්නට වූ අතර, මෙයට සම්බන්ධ වන පුද්ගලයන්ගෙන් මුදලක් අය කර සම්බන්ධ කර ගැනීම පිරමීඩ ජාවාරම්වල ස්වභාවයයි.
පිරමීඩ ඇතුළු තහනම් ණය යෝජනා ක්‍රමවලට හසු වූ ඇත්තෝ තමන් කාලයක් තිස්සේ දුක් මහන්සියෙන් හරි හම්බ කර ගත් ධනය අහිමි කර ගනිමින් සිත් තැවුලෙන් පසුවෙති. වංචනික සහ කෙටි මාර්ග ඔස්සේ ධනය වැඩි කර ගැනීමට ගොස් කබලෙන් ලිපට වැටෙන ඔවුන් දැනුම්වත් කිරීමේ මහඟු කාර්යය ප්‍රබුද්ධ ජනමාධ්‍යයේ කාර්යභාරයකි. ඒ අනුව යමින් ජනතාව දැනුවත් කිරීම මෙම ලිපියේ අරමුණයි.
පිරමීඩ ඇතුළු තහනම් ණය යෝජනා ක්‍රමවලට හසුව මුදලත්, තමන්ගේ දුක් මහන්සියෙන් හම්බ කර ගත් ධනයත් අහිමි කර ගනිමින් අවාසනාවන්ත තත්ත්වයන්ට මුහුණපෑමට මහජනතාවට සිදු නොවන තැනට වගබලා ගැනීම සමාජයේ ඔබ අප සැමගේ වගකීමකි. මෙහිදී වංචනික සහ කෙටි මාර්ග ඔස්සේ ධනය වැඩි කර ගැනීමට ක්‍රියා කරන මහජනතාව ද එවැනි දේ කිරීමට පෙර දෙවරක් සිතා බැලිය යුතුය. මහජනතාව මූල්‍ය වංචනිකයන්ට හසු නොවීමට තරම් බුද්ධිමත් විය යුතුය.
එපමණක් නොව මෙවැනි තහනම් ණය යෝජනා ක්‍රම හරහා මෙරට මූල්‍ය පද්ධතියට වන බලපෑම වැළැක්වීම සම්බන්ධයෙන් ශ්‍රී ලංකා මහ බැංකුවට ද විශාල වගකීමක් පැවරී තිබේ. ඒ අනුව 2011 වසරේ සිට මේ දක්වා ආයතන 21කට එරෙහිව නීතිමය ක්‍රියාමාර්ග සහ විමර්ශන ක්‍රියාමාර්ග ගෙන තිබෙන බව මහ බැංකුව සඳහන් කරයි.
වසර 1988 අංක 30 දරන බැංකු පනතේ සංශෝධන 83C වගන්තිය යටතේ තහනම් යෝජනා ක්‍රම වැළැක්වීම සඳහා තමන් ගනු ලැබූ ප්‍රගතිය සඳහන් කරමින් මහ බැංකුව එසේ කියා සිටියි.
පිරමීඩ ඇතුළු තහනම් යෝජනා ක්‍රම දිනෙන් දින ව්‍යාප්ත වීම වැළැක්වීමට මහ බැංකුව විසින් දැනුවත් කිරීමේ කටයුතු සිදු කරයි. මහ බැංකුව සේම නීතිය ක්‍රියාත්මක කරන සෙසු ආයතන ද මීට එක් වෙමින් මහජනයා දැනුවත් කිරීමේ කටයුතු සිදු කරයි. මහ බැංකුවත්, සෙසු ආයතනත් මේ සිදු කරන්නේ මහජනතාව මෙම උවදුරින් බේරා ගැනීමට තමන්ට කළ හැකි මූලිකම මෙන්ම පළමු කාර්යයි.
ශ්‍රී ලංකා මහ බැංකුව නීතිමය ක්‍රියාමාර්ග ගෙන ඇති සහ විමර්ශන කටයුතු සිදුකරන ආයතන 20 මෙසේයි.
Tiens Lanka Health Care (Pvt) Ltd, Best life International (Pvt) Ltd, Mark-Wo International (Pvt) Ltd, V M L International (Pvt) Ltd, Fast3Cycle International (Pvt) Ltd, Sport chain app, Sport chain zs society Sri Lanka, Ommax DT, MTFE App, MTFE SL Group, MTFE Success Lanka, MTFE DSCC Group, Fastwin (Pvt) Ltd, Fruugo Oline App/Fruugo Oline (Pvt) Ltd, Ride to Three Freedom (Pvt) Ltd, Qnet, Era Miracle (Pvt) Ltd and Genesis Business School, Ledger Block, Isimaga International (Pvt) Ltd, Beecoin App and Sinbird Foundation, Windex Trading, The Enrich Life (Pvt) Ltd, Smart Win Enterprenure (Private) Limited, Net Fore International (Pvt) Ltd / Netrrix
මෙරට මූල්‍ය පද්ධතියේ ස්ථාවරත්වයට අවදානම් එල්ල කරන තහනම් යෝජනා ක්‍රම වැළැක්වීමට මහ බැංකුව නීත්‍යනුකූලව කටයුතු කර තිබේ. එහිදී විශේෂයෙන් තහනම් යෝජනා ක්‍රමවලට අදාළ කටයුතු ආරම්භ කිරීම, අර්පණය කිරීම, ප්‍රවර්ධනය කිරීම, දැන්වීම් පළ කිරීම, පවත්වාගෙන යෑම, කළමනාකරණය, මුදල් සැපයීම හෝ පාලනය කිරීම තහනම්ය.
එම නිසා මහ බැංකුව බැංකු පනතේ බලතල අනුව එවැනි දේ සිදු කරන අයට එරෙහිව නීතිය ක්‍රියාත්මක කිරීමට කටයුතු කොට ඇත.
පිරමීඩ ජාවාරම
වැඩි දෙනෙක් ඉක්මනින් පොහාසත් වීමට දක්වන්නේ පුදුමාකාර කැමැත්තකි. එය මෙරට පමණක් නොව විදෙස් රටවල ද ජනතාවටද පොදු කරුණකි. ඒ සඳහා ඇති පහසුම මාර්ගය වන්නේ පිරමීඩාකාර මූල්‍ය ජාවාරමයි. කලින් කලට විවිධ ස්වරූපයන්ගෙන් පැමිණෙන මෙම ජාවාරම මෙරට තුළ තහනම් මූල්‍ය ක්‍රමයකි. මුලදී එක් අයකු විසින් තවත් පුද්ගලයන් පහක් හෝ දහයක් ඍජුවම මුදල් අයකර මෙම පද්ධතිය තුළට ඇතුළු කර ගනී. මෙම දහදෙනා තවත් දහය බැඟින් දහයක් බඳවා ගනී. මෙසේ ආරම්භ වන මෙම ජාවාරමේ මුල් සාමාජිකයන්ට කොමිස් මුදල් ලැබෙන්නේ මේ සඳහා තව තවත් අලුතින් සාමාජිකයන් සම්බන්ධ කර ගැනීම තුළිනි. ශ්‍රී ලංකා මහ බැංකුවේ උකුසු ඇස මේ කෙරෙහි යොමු වන හැම අවස්ථාවකම මෙරට තුළ පිරමීඩ ජාවාරම යම් තරමකින් අඩුවුවත් ටික දිනකට පසු යළිත් පෙර තිබුණාටත් වඩා හොඳින් පිරමීඩ ජාවාරම් ක්‍රියාත්මක වේ.
අද වන විට බොහෝ විශ්‍රාමිකයන්ට තම විශ්‍රාම දිවිය සුවසේ ගත කිරීමේ හැකියාව නොලැබී ඇත්තේ මෙම පිරමීඩ ජාවාරම්කරුවන් හේතුවෙනි. එලෙස පිරමීඩ ජාවාරම්කරුවන්ට පිනුම් ගසන්නට ඉඩ හසර ලැබී ඇත්තේ මහ බැංකුව පිරමීඩ ජාවාරම්කරුවන් වෙනුවෙන් මන්දගාමී ප්‍රතිපත්තියක් අනුගමනය කිරීම හේතුවෙනි.
ජීවිත කාලයම දුක්විඳ හරිහම්බ කර උපයා ගන්නා මුදල් වැඩි පොලියක් ලැබෙන තැන්වල ආයෝජනය කරන්නේ රාජ්‍ය හා පෞද්ගලික බැංකුවලින් වැඩි පොලියක් නොලැබෙන බැවිනි. අවදානම් පැවතුණත් කීයක් හෝ වැඩිපුර උපයාගෙන දරු මල්ලන් සමඟ සතුටින් කාලය ගතකිරීම සෑම කෙනකුගෙම සිහිනයයි. නමුත් දැන් එම සිහිනයට නොයෙක් වෙස් ගත් රාක්ෂයන් නිසා බරපතළ තර්ජනයක් මතුවී ඇත.
ජනතාව ආරක්ෂා කිරීමට ඇති හොඳම මාර්ගය නිරතුරුව ඔවුන් දැනුවත් කිරීමයි. මේ වනවිටත් මහ බැංකුව මඟින් ජනතාව දැනුවත් කිරීම සඳහා විවිධ වැඩසටහන් ක්‍රියාත්මක කළත් ඒවා එකක්වත් සියයට සීයක් සාර්ථක වී නැත. එම වැඩපිළිවෙළ සාර්ථක වූවානම් දිනෙන් දින අලුතින් පිරමීඩ ජාවාරම් හතු පිපෙන්නාක් මෙන් ආරම්භ වන්නේ නැත.
වගා ව්‍යාපෘති
මේ වනවිටත් මහ බැංකුව මෙවැනි නීති විරෝධී මූල්‍ය ආයතනවලට එරෙහිව ජනතාව දැනුවත් කිරීම සඳහා වැඩසටහන් රැසක් ක්‍රියාත්මක කොට ඇති බවයි. ඒ අනුව 83 (ඈ) 03 වගන්තිය යටතේ නිතිය ක්‍රියාත්මක කිරීම සඳහා සැකකරුවන් පොලීසියට යොමුකළ හැකි බවත් නීතිවිරෝධී මූල්‍ය ආයතන සම්බන්ධයෙන් ජනතාව දැනුම්වත් කිරීම සඳහා විද්‍යුත් හා මුද්‍රිත මාධ්‍යවල දැන්වීම් පළකරන බවත් මහබැංකුව කියයි.
රට තුළ නීති රීති දැඩිවත්ම ජාවාරම්කරුවන් විසින් අලුත් අලුත් ක්‍රම මේ සඳහා සොයා ගනී. පසුගිය කාලයේ ක්‍රියාත්මක වූ එවන් එක් ක්‍රමයක් වන්නේ විවිධ වන වගා ව්‍යාපෘතියි. තේක්ක වගාව, අඹ වගාව, ගස්ලබු වගාව ආදී ලෙසින් නොයෙකුත් වන වගා ව්‍යාපෘති රැසක් ක්‍රියාත්මක විය. ඒ නියමිත මුදලට වඩා දෙතුන් ගුණයක් වැඩි මිලකටය. ඒ තුළට නව සාමාජිකයන් එකතු කර ගැනීම තුළින් මෙම ජාවාරම ටික කලක් කරගෙන ගියේය.
මේ වන විට බොහෝ දෙනා online ගනුදෙනු සඳහා වැඩි වශයෙන් යොමු වේ. මේ අවස්ථාවෙන් ප්‍රයෝජන ගත් වංචාකාර පිරමීඩ ජාවාරම්කරුවන් සිදු කළේ ඩිරෙක්ට් මාර්කටින්වලට මුවා වී තම පිරමීඩ ජාවාරම නැවත වටයකින් ව්‍යාප්ත කිරීමයි. එහිදී ඩිරෙක්ට් මාර්කටින්වලදී මෙන් භාණ්ඩ විකිණීමට යැයි පවසා අලුතින් සාමාජිකයන් බඳවා ගන්නට වූ අතර, මෙයට සම්බන්ධ වන පුද්ගලයන්ගෙන් මුදලක් අය කර සම්බන්ධ කර ගැනීම පිරමීඩ ජාවාරම්වල ස්වභාවයයි. නමුත් ඩිරෙක්ට් මාර්කටින්වලදී කිසිවිටක එම ජාලයට ඇතුළු වීමට හෝ පුහුණුවට ආදී වශයෙන් කිසිදු දෙයකට මුදලක් ගෙවිය යුතු නැත.
පිරමීඩ ජාවාරම්කරුවන් ඩිරෙක්ට් මාර්කටින්වලදී මෙන් භාණ්ඩ අලෙවි කිරීම ඉදිරියට දමාගෙන මෙම වංචාව සිදු කළත් එම භාණ්ඩවල මිල සටහන් කර ඇත්තේ භාණ්ඩයේ නියමිත මිලට වඩා දෙතුන් ගුණයක් ඉහළ මිලකටය. ඒ එම මිල ගෙවා භාණ්ඩ මිලට ගෙන මෙම ජාලයට සම්බන්ධ වන පුද්ගලයන්ගෙන් ලැබෙන මුදල්වලින් මෙම ජාලයේ මුල් පුරුක්වල සිටින සාමාජිකයන්ට කොමිස් මුදල් ගෙවිය යුතු බැවිනි. අලෙවි කිරීම වෙනුවට සිදු කරන්නේ වැඩි වැඩියෙන් අලුත් අලුත් සාමාජිකයන් බඳවා ගැනීමය.
මෑත කාලයේ වැඩිපුරම පිරමීඩ ජාවාරම්කරුවන් තම වංචාව සඳහා භාවිතා කළ භාණ්ඩ වන්නේ සූර්ය පැනල පද්ධති, ඔර්ලෝසු, ජංගම දුරකතනය.
ලෝකය දිනෙන් දින දියුණු වීමත් නව නව තාක්ෂණයෙන් සන්නද්ධ වීමත් සමඟ මේ වන විට භාවිතයට පැමිණ ඇති මුදල් ඒකකයක් වන්නේ විද්‍යුත් මුදල් ඒකකයයි. එනම් ක්‍රිප්ටෝ මුදල්ය. ක්‍රිප්ටෝ මුදල් යනු කිසිදු රටක පිළිගත් මූල්‍ය අධිකාරියට මැදිහත්වීමකින් තොරව පුද්ගලික වශයෙන් ජනනය වන අතත්‍ය මුදල් වර්ගයකි. මෙහි සියලු ගනුදෙනු අන්තර්ජාලය හරහා සිදුවේ.
ක්‍රිප්ටෝ මුදල්
එසේම ක්‍රිප්ටෝ මුදල් ඒකකය මේ රට තුළ වලංගු මුදල් ඒකකයක් නොවේ. ශ්‍රී ලංකා මහ බැංකුව විසින් ක්‍රිප්ටෝ මුදල් සම්බන්ධ මූලික කාසි නිකුතුවකට එහි කිසිදු ප්‍රභේදයකට, ක්‍රිප්ටෝ මුදල් ජනනය කිරීමේ කාර්යයකට, මුදල් හුවමාරුවකට, මුදල් සම්බන්ධ තැන්පතු භාර ගැනීමට හෝ භාරකාර සේවා සැපයීම් හෝ ක්‍රිප්ටෝ මුදල් ආයෝජන උපදේශන සේවා සඳහා අනුමැතිය ලබාදී නැත.
නමුත් මෙම විද්‍යුත් මුදල් ඒකක භාවිත කරමින් විශාල වශයෙන් පිරමීඩාකාර ජාවාරම් කිහිපයක්ම පසුගිය කාලයේ මෙරට තුළ ක්‍රියාත්මක විය. ආයෝජනය කළ මුදල මෙන් දෙතුන් ගුණයක් ඉතා කෙටි කාලයකින් ලබාගත හැකි යැයි පවසමින් ක්‍රියාත්මක වූ මේ සඳහා ආයෝජකයන් සම්බන්ධ කර ගැනීමට බොහෝ දුරට භාවිත කරන්නේ සුපිරි හෝටල්ය. ඒ ජනතාවට විශ්වාසයක් ඇති වන ආකාරයෙන් කටයුතු කිරීම සඳහාය. එසේම කුලියට ලබා ගන්නා සුඛෝපභෝගී වාහනවලින් මෙවැනි වංචාකාරයන් පැමිණෙන අතර මෙහි ආයෝජනය කරන ජනතාවට ඉතා කෙටි කලකින් මෙවැනි සුඛෝපභෝගී ජීවිතයක් ගත කිරීමට හැකි බව පෙන්වීම මෙහි මූලික අරමුණයි.
මෙවැනි වංචාවකට කුමනාකාරයෙන් හෝ සම්බන්ධ පුද්ගලයකුට බරපතළ වැඩ ඇතිව හෝ නැතිව වසර තුනක සිර දඬුවමක් හෝ උපරිමය මිලියනයක දඩයකට හෝ එම දඬුවම් දෙකම පැනවිය හැක.
තවත් පුද්ගලයකු අමාරුවේ දැම්මේ ඒ පුද්ගලයාට අලාභයක් වන බව දැන දැනම නම් බරපතළ වැඩ ඇතිව හෝ නැතිව වසර තුනක් සහ උපරිමය වසර 5ක් දක්වා සිර දඬුවමකුත් රුපියල් මිලියන දෙකක් හෝ බඳවාගත් අය යෙදූ මුදල් මෙන් දෙගුණයක් යන දෙකෙන් වැඩි අගයට සමාන දඬුවමක් හෝ මේ දඬුවම් දෙකම හිමි වේ.
මේ ආකාරයෙන් උපයා ගන්නා මුදල්, මුදල් විශුද්ධිකරණය සඳහා හෝ ත්‍රස්තවාදී කටයුතු සඳහා යොදා ගන්නා බවට තීරණය කළ හැකි අවස්ථාවකදී එම මුදල් රජයට පවරා ගත හැකිය.
ඉක්මනින් පොහොසත් වීම
ජනතාව දැන දැනත් මෙවැනි මූල්‍ය ගනුදෙනු සඳහා වැඩි වැඩියෙන් යොමු වන්නේ ඉක්මනින් පොහොසතකු වීමට ඇති කැමැත්ත හේතුවෙනි. සෑම කෙනෙක්ම සිතන්නේ තමන් මෙහි මුල් පුරුකක් විය හැකි බවයි. එහෙමත් නැතිනම් මෙම සමාගම එවැනි වංචාකාර සමාගමක් නොවනු ඇතැයි කියාය. සමහරුන් මෙවැනි තැන්වල දැන දැනත් ආයෝජනය කරන්නේ තමන් මෙහි මුල් පුරුකක් වී ආයෝජනය කළ මුදල ලබාගත් පසු අනිත් පුද්ගලයාට හෙණ ගැහුවත් කමක් නැහැ යන සිතුවිල්ලෙනි.
විවිධ නීති විරෝධී ක්‍රම මඟින් උපයන ධනය ද මෙවැනි වංචාකාර සමාගම්වල ආයෝජනය කරනු අනන්තවත් දක්නට ලැබේ. තවත් කොටසක් සැබෑ ලෙසම නොදැනුවත්භාවය නිසා මෙවැනි පිරමීඩාකාර ජාවාරම්වල මුදල් ආයෝජනය කරන අවස්ථාද නැතුවාම නොවේ. ඒ කෙසේ වෙතත් දැන හෝ නොදැන රජයේ පිළිගත් බැංකු පද්ධතියෙන් තොරව මෙවන් තැන්වල මුදල් ආයෝජනය කිරීමෙන් සිදුවන පාඩුව තමන් විසින් දරා ගැනීමට සූදානම් විය යුතුය. පසුව මහ බැංකුවටත් වෙනත් කිසිදු පාර්ශ්වයකට දොස් නැඟීමෙන් ඵලක් නැත.
