පෙට්‍රල් මිල බැස්සත් ත්‍රිරෝද-පාසල් වෑන් ගාස්තු වෙනසක් නෑ
- CNL Reporter
- April 2, 2025
- පුවත්
- පෙට්‍රල් මිල
- 0 Comments
පෙට්‍රල් මිල අඩුකළ ද ත්‍රිරෝද රථ හා පාසල් වෑන් ගාස්තු අඩුකළ නොහැකි බව ප්‍රවාහන සංගම් පවසයි.
පෙට්‍රල් රුපියල් 10කින් අඩු කළ ද ත්‍රිරෝද රථ ගාස්තු අඩුකළ නොහැකි බව සමස්ත ලංකා ත්‍රිරෝද රථ රියැදුරන්ගේ වෘත්තීය සමිතියේ සභාපති ලලිත් ධර්මසේකර මහතා “දිවයින”ට ඊයේ (01දා) පැවසීය. වර්තමානයේ ත්‍රිරෝද රථ කර්මාන්තය පවත්වාගෙන යන්නේද ඉතා අපහසුවෙන් බවද සභාපතිවරයා කීය.
තවදුරටත් කතා කළ ලලිත් ධර්මසේකර මහතා මෙසේද කියා සිටියේය.
“පෙට්‍රල් ලීටරයක්ම රුපියල් 10යි අඩුවෙලා තියෙන්නේ. සාමාන්‍යයෙන් ලීටරයෙන් කිලෝමීටර් 20ක් වගෙයි ධාවනය කරන්නේ. එතකොට සත පහක් තියාගන්නේ නැතුව රුපියල් 10ම දුන්නත් කිලෝමීටරයකට සත 50යි අඩුකරන්න පුළුවන්. ඕක ප්‍රායෝගික නෑනේ. මේ වෙද්දීත් ගාස්තු තීරණයක් නැතුව හිතු හිතූ ගාස්තු අයකරන ත්‍රිරෝද රථ ලංකාව පුරාම තියෙනවා. ඒ නිසා සත 50ක් රුපියල් 10ක් අඩු කළත් උත්තරය ඒක නෙමෙයි. වඩාත් ඵලදායි විශ්වාසවන්ත ත්‍රිරෝද රථ සේවයක් ඇති කිරීම තමා අපේ අරමුණ. වඩා විධිමත් නියාමනයකින් වඩාත් ඵලදායි සේවාවක් මහජනතාවට ලබාදීමට රජය මැදිහත් විය යුතුයි.
ඉන්ධන ගාස්තු අඩුවුවත් පාලස් වෑන් ගාස්තුව අඩු නොකරන බව සමස්ත ලංකා අන්තර් දිස්ත්‍රික් පාසල් ළමුන් ප්‍රවාහන සේවා සංගමයේ සභාපති එන්.එම්.කේ. හරිස්චන්ද්‍ර පද්මසිරි මහතා “දිවයින”ට පැවැසීය.
තවදුරටත් කතා කළ ඒ මහතා මෙසේද කීය.
“රජයට ගෙවන බදු උපරිමයෙන් වැඩිවෙලා තියෙනවා. ටයර් මිල, අමතර කොටස් මිල එකකට එකක් වැඩියි. මේවා පාසල් වෑන් රථ, බස් රථ හිමියන් හරිම අමාරුවෙන් මේ කර්මාන්තය කරගෙන යන්නේ. දිවයිනේම පාසල් ප්‍රවාහන වෑන් රථ, බස් රථ 28,000ක් තියෙනවා. අපි දන්නවා මේ වෙලාවේ දෙමාපියොත් අමාරුවෙන් යන්නේ.”
ප්‍රදීප් ප්‍රසන්න සමරකෝන්
