මත්ද්‍රව්‍ය හා අපරාධවලට සම්බන්ධ සැකකරුවෝ 30,000ක් පොලිස් දැලේ මෙහෙයුම් අඛණ්ඩව – පොලිස් මාධ්‍ය ප්‍රකාශක
- CNL Reporter
- February 18, 2025
- පුවත්
- මත්ද්‍රව්‍ය
- 0 Comments
පොලිසිය මගින් සිදුකරනු ලබන අපරාධ හා මත්ද්‍රව්‍ය මෙහෙයුම්වලදී සැකකරුවන් තිස් දහසකට අධික පිරිසක් පොලිසිය විසින් අත්අඩංගුවට ගෙන ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි බුද්ධික මනතුංග මහතා පැවසීය.
ඒ මහතා එසේ පැවසුවේ බත්තරමුල්ල සුහුරුපායේ පිහිටි පොලිස් කොට්ඨාස කාර්යාලයේ පැවැති මාධ්‍ය හමුවකදීය. මෙරට සියලුම පොලිස් ස්ථාන ආවරණය වන පරිදි මෙම මෙහෙයුම් ආරම්භ කරන බව ද මෙම මෙහෙයුම් අඛණ්ඩව සිදුකරන බව ද ඒ මහතා පැවසීය.
ඒ අනුව අපරාධවලට සම්බන්ධ පුද්ගලයන් 920 දෙනකු ද විවෘත වරෙන්තුකරුවන් 14,000ක් ද මත්ද්‍රව්‍යවලට සම්බන්ධ පුද්ගලයන් 16,000ක් ද අත්අඩංගුවට ගෙන ඇති බවත්, බීමත් රියැදුරන් 11,757කට එරෙහිව නීතිමය පියවර ගැනීමට කටයුතු කරන බව ද පොලිස් මාධ්‍ය ප්‍රකාශකවරයා සඳහන් කළේය.
මෙම වැටලීම්වල දී ගිනි අවි 197ක් ද ස්වයංක්‍රීය ගිනි අවි සහ දේශීය නිෂ්පාදිත ගිනි අවි තොගයක් ද පොලිස් භාරයට ගත් බවත් ඒ මහතා වැඩිදුරටත් පැවසීය.
පොලිස් අඩංගුවට ගත් භාණ්ඩ අතර හෙරොයින් කිලෝ 14ක්, හෂිස් කිලෝ 20ක්, අයිස් කිලෝ 33ක් සහ ගංජා කිලෝ 1123ක් තිබුණු බව ද පොලිස් මාධ්‍ය ප්‍රකාශකවරයා පැවසීය.
ධර්මසේන වැලිපිටිය
