මින් ඉදිරියට මෙරට ඖෂධ සැපයීමේ ක්‍රියාවලියට කිසිදු ආකාරයක දේශපාලන බලපෑමක් නෑ – සෞඛ්‍ය හා ජනමාධ්‍ය ඇමති වෛද්‍ය නලින්ද ජයතිස්ස
- Sujeewa Senerath
- April 4, 2025
- දේශපාලන, පුවත්
- health ministry of sri lanka, nalinda jayatissa
- 0 Comments
මෙරට ජනතාවට උසස් සහ ගුණාත්මක සෞඛ්‍ය සේවාවක් ලබාදීමේ වත්මන් රජයේ ප්‍රතිපත්තියට අනුව යමින් හිඟයකින්, ප්‍රමාදයකින්, තොරව අඛණ්ඩ ව ඖෂධ සැපයීම සහතික කිරීම සඳහා ප්‍රසම්පාදන ක්‍රියාවලියත් ඒ හා සම්බන්ධ අනෙකුත් කටයුතුත් විධිමත් කිරීමට අවශ්‍ය සියලු පියවර ගෙන ඇති බවත් එම කටයුතු අඛණ්ඩ ව හා ක්‍රමවත් ව පවත්වා ගැනීමට අවශ්‍ය සහයෝගය ලබා දීම අත්‍යවශ්‍ය බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා මෙරට සෞඛ්‍ය සේවාවේ නියුතු සියලුම ඖෂධ සැපයීමේ ක්‍රියාවලියට සම්බන්ධ නිලධාරීන්ට සහ බලධාරීන්ට අවධාරණය කරනු ලැබී ය.
සෞඛ්‍ය හා ජනමාධ්‍ය අමාත්‍යවරයා මෙම අදහස් පළ කරනු ලැබුයේ, ඖෂධ හා සෞඛ්‍ය ආශ්‍රිත උපකරණ සැපයීමේ කටයුතුවලට ඍජුව ම දායක වන සියලුම නිලධාරීන් සහ බලධාරීන් මෙරට සෞඛ්‍ය සේවා ඉතිහාසයේ ප්‍රථම වතාවට එක් ස්ථානයකට රැස්කර ඖෂධ සහ උපකරණ ප්‍රසම්පාදන ක්‍රියාවලියේදී ඇති වන ප්‍රමාදයන් අවම කර ගනිමින් ප්‍රසම්පාදන ක්‍රියාවලිය විධිමත් කිරීම පිළිබඳ ව කරුණූ සාකච්ඡා කිරීමේ හා දැනුවත් කිරීමේ අරමුණින් කොළඹ ජාතික රෝහලේ නව බාහිර රෝගී අංශ ගොඩනැගිල්ලේ ශ්‍රවණාගාරයේ දී (03) පස්වරුවේ පැවැති රැස්වීම අමතමිණි.
ප්‍රසම්පාදන ක්‍රියාවලියේදී ඖෂධ සහ උපකරණ පිළිබඳ තාක්ෂණික ඇගයීම ඉතා වැදගත් කාර්යභාර්යක් ඉටු කරන බවත් එම ක්‍රියාවලියේ පැවති අඩුපාඩු, දුර්වලතා සහ ප්‍රමාදයන් ද මේ වන විට හඳුනාගෙන ඇති බවත් එම කරුණු ද සමස්ත ප්‍රසම්පාදන ක්‍රියාවලියට බාධාවක් ව පැවති බව ද මෙම රැස්වීමේ දී අනාවරණය විය.
ඒ අනුව මෙරට සෞඛ්‍ය සේවාවේ ඖෂධ හා වෛද්‍ය උපකරණ මිල දී ගැනීමේ ප්‍රසම්පාදන ක්‍රියාවලිය විධිමත් කිරීම සඳහා අලුතින් ගෙන ඇති සහ හඳුන්වා දී ඇති පියවරයන් පිළිබඳ ව සෞඛ්‍ය අමාත්‍යාංශයේ අතිරේක ලේකම් (ප්‍රසම්පාදන) රෝහණ ද සිල්වා මහතා ද, ඖෂධ සහ අනෙකුත් සෞඛ්‍ය සේවා නිෂ්පාදන ප්‍රසම්පාදන ක්‍රියාවලියේදී ඇගයීම් කමිටු සාමාජිකයින් ලෙස වෛද්‍ය විශේෂඥයින්ගේ කාර්යභාරය පිළිබඳ ව රාජ්‍ය ඖෂධ නීතිගත සංස්ථාවේ සභාපති ආචාර්ය මනුජ් සී වීරසිංහ මහතා ද ඉතා දීර්ඝ ලෙස අදහස් දැක්වීම් සිදු කරනු ලැබී ය.
සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා මෙහි දී වැඩිදුරටත් අදහස් දක්වමින් සෞඛ්‍ය සේවාවේ මතු වී තිබෙන සහ මතුවිය හැකි අභියෝග ජය ගැනීම සඳහා එක් කණ්ඩායමක් ලෙස සියලු අංශයන් හි සහයෝගය ලබාගෙන කටයුතු කිරීම සිය අරමුණ බව අවධාරණය කරන ලදී.
එමෙන් ම පසුගිය කාලය පුරාවට ම සෞඛ්‍ය ක්ෂේත්‍රයට කිසියම් හෝ චෝදනා එල්ල වුයේ සමස්තයක් ලෙස ඖෂධ සැපයීමේ ක්‍රියාවලියේ ගැටළු මත බවත්, ඖෂධවල ගුණාත්මකභාවය, මිල සහ හිඟය ද ඊට ප්‍රබලව හේතු වු බව ද පැවසී ය.
ස්වභාවික ව කිසිවෙකු නොසිතන අවස්ථාවන් හි සිදුවන සිදුවීම්වලට වඩා මෙම ගැටළුව සංකීරණ බවත් එබැවින් එම තත්වයන් වළක්වා ගැනීමට විධිමත් වැඩපිළිවෙළක් මේ වන විට සකස් කර ඇති බවත්, එයට යහපත් නව එක් කිරීම් ඉදිරියට ද සිදු කළ හැකි බව ද පැවසී ය.
මෙහි දී වැඩිදුරටත් අදහස් දැක් වු අමාත්‍යවරයා මෙවර අයවැයෙන් සෞඛ්‍ය සඳහා වෙන් වූ බිලියන 604 ක් වූ මුදලින් වැඩිම මුදලක් එනම් රුපියල් බිලියන 200 කට ආසන්න මුදල් ප්‍රමාණයක් ඉදිරි මාස 08 සදහා අවශ්‍ය ඖෂධ සහ ශල්‍ය උපකරණ මිල දී ගැනීමට වෙන් කර ඇති බව ද පැවසී ය. වැටුප් ගෙවීමට බිලියන 150 ක් වෙන් කර ඇති බව ද පෙන්වා දුන් අමාත්‍යවරයා, භාණ්ඩාගාරය සෞඛ්‍ය සදහා ලබාදෙනු ලබන මුදල් සම්බන්ධ කිසිඳු ගැටළුවක් නොමැති බව ද, අවධාරණය කළේ ය.
භාණ්ඩාගාරයෙන් නියමිත පරිදි නිසි අයුරින් මුදල් වෙන් කර තිබිය දී ඖෂධ සහ වෛද්‍ය උපකරණ ලබාදීමේ ක්‍රියාවලියට යන කාලය අවම කර ගැනීම පිළිබඳ ව සම්පුර්ණ අවධානය යොමු කළ යුතු බව, සඳහන් කළ අමාත්‍යවරයා භාණ්ඩාගාරයෙන් වෙන් වන මුදල් ප්‍රමාදයකින් තොර ව සැපයුම්කරුවන්ට ලබා දීමේ ක්‍රියාවලිය ද, කාර්යක්ෂම කිරීමට පියවර ගන්නා බව ද පැවසී ය.
මින් ඉදිරියට රෝහල්වලට අවශ්‍ය ඖෂධ පිළිබඳ ව තොරතුරු කඩිනමින් සහ ක්‍රමවත්ව ලබාගෙන අදාළ රෝහල් වෙත එම ඖෂධ සැපයීමේ ක්‍රියාදාමයට ගත වන විශාල කාලය සහ ප්‍රමාදයන් අඩු කර ගැනීමට කණ්ඩායමක් ලෙස කටයුතු කිරීම අත්‍යවශ්‍ය බවත් ඒ තුළින් ඖෂධ සැපයීමේ ක්‍රියාදාමය අඛණ්ඩ ව පවත්වාගෙන යාමට හැකියාව ලැබෙන බව ද අමාත්‍යරයා මෙහි දී අවධාරණය කළේ ය.
මෙම කාර්යය මෙතැන් සිට ආරම්භ කර පවතින ගැටලු සහ අඩුපාඩු අවම කර ගනිමින් 2026 වසර වන විට මෙරට ඖෂධ සැපයීමේ ක්‍රියාදාමය ඉතා විධිමත් සහ විශිෂ්ට අයුරින් සිදු කිරීමට අවශ්‍ය සෑම පියවරක් ම ගත යුතු බව අමාත්‍යවරයා මෙහි දී සියලු පාර්ශවයන්ට දැඩි ව අවධාරණය කළේ ය.
විශේෂයෙන් ම මින් ඉදිරියට පුරවැසියන්ට අවශ්‍ය ගුණාත්මකබවින් ඉහළ ඖෂධ ප්‍රමාදයකින් තොර ව අඛණ්ඩව ලබාදීමට කටයුතු කළ යුතු බවත්, මුදල් වෙන් කර තිබිය දී අවශ්‍ය ඖෂධ නියමිත පරිදි ලබාදීමට අදාළ ව මෙම ක්‍රියාවලිය නිවැරදි ව සිදු නොවනවා නම් රජය ඍජුවම මැදිහත් වී ඖෂධ නිෂ්පාදනය කරන රටවල රජයන් සමඟ සාකච්ඡා කර ඖෂධ ලබාගැනීමේ ක්‍රමවේදයකට යාමට සිදුවනු බව ද පැවසී ය. තව ද, මින් ඉදිරියේ දී ඖෂධ සැපයීමේ ක්‍රියාවලියට දේශපාලන වශයෙන් කිසිඳු බලපෑමක් සිදු නොවන බව ද, අවධාරණය කළේ ය.
මෙම අවස්ථාවට සෞඛ්‍ය හා ජනමාධ්‍ය අමාත්‍යාංශයේ තාක්ෂණික ඇගයුම් කමිටු නියෝජනය කරන සියලුම නිලධාරීන්, සෞඛ්‍ය අමාත්‍යාංශයේ ප්‍රසම්පාදන අංශ නිලධාරීන්, රාජ්‍ය ඖෂධ නිෂ්පාදන සංස්ථාවේ, රාජ්‍ය ඖෂධ නීතිගත සංස්ථාවේ, ජාතික ඖෂධ නියාමන අධිකාරියේ සහ වෛද්‍ය සැපයීමේ අංශය යන ආයතනවල නිලධාරීන්, විශේෂඥ වෛද්‍ය විද්‍යායතන සහ ශ්‍රී ලංකා ත්‍රිවිධ හමුදා විශේෂඥ වෛද්‍ය විද්‍යායතන නිලධාරීන් ඇතුළු විශේෂඥ වෛද්‍යවරුන් පිරිසක් එක් ව සිටියහ.
