ත්‍රස්තවාදය වැළැක්වීමේ පනත අහෝසි කරන්න සූදානම් – ජනපති
- CNL Reporter
- March 1, 2025
- දේශපාලන
- ත්‍රස්තවාදය වැළැක්වීමේ පනත
- 0 Comments
ආරක්ෂාව සඳහා අනතුරක් විය හැකි සංවිධානාත්මක අපරාධ කල්ලි හා ජාතිවාදී, අන්තවාදී ප්‍රවණතාවයන් සාමාන්‍ය නීතිය යටතේ විසඳීමට නොහැකි නම් ඒ සඳහා නව නීති සකස් කළ යුතු බව ජනාධිපති අනුර කුමාර දිසානායක පැවසීය.
ඒ සඳහා අවශ්‍ය නව නීති රාමුවක් හරහා ත්‍රස්තවාදය වැළැක්වීමේ පනත අහෝසි කරන බවත් ඒ සඳහා කමිටුවක් මේ වනවිට ස්ථාපිත කර ඇති බවත් ජනාධිපතිවරයා කියා සිටියේය.
ජනාධිපති අනුර කුමාර දිසානායක එබව කියා සිටියේ, ආරක්ෂක අමාත්‍යවරයා ලෙස ඊයේ (28) පාර්ලිමේන්තුවේදී 2025 අයවැය විවාදයේ කාරක සභා අවස්ථාවේ ආරක්ෂක අමාත්‍යාංශය, මහජන ආරක්ෂක හා පාර්ලිමේන්තු කටයුතු අමාත්‍යාංශවල වැය ශීර්ෂය පිළිබඳ විවාදයේ පිළිතුරු කතාව සිදු කරමිනි.
”නීත්‍යානුකූල රාජ්‍යයට යටින් තිබෙන අපරාධ රාජ්‍යය ජාතික ජන බලවේගයේ ආණ්ඩුව විසින් අවසන් කරනවා”
නීත්‍යානුකූල රාජ්‍යයට යටින් තිබෙන අපරාධ රාජ්‍යය ජාතික ජන බලවේගයේ ආණ්ඩුව විසින් අවසන් කරනු ලබන බව ද ජනාධිපති අනුර කුමාර දිසානායක ප්‍රකාශ කළේය.
ඉතිහාසයේ ජාතික ආරක්ෂාවට තර්ජනයක් වූයේ ජාතිවාදය සහ අන්තවාදය බවත්, ශ්‍රී ලංකාව තුළ නැවත ජාතිවාදයට හෝ අන්තවාදයට හිස එසවීමට වත්මන් ආණ්ඩුව ඉඩ නොතබන බවත් ජනාධිපතිවරයා අවධාරණය කළේය.
”වත්මන් රජය අශිෂ්ටත්වයේ යුගය අවසන් කර, ශිෂ්ටත්වයේ මාර්ගය සකස් කර තිබෙනවා”
ආර්ථික අර්බුදයක් හෝ රට තුළ ආරක්ෂාව නැති බවට චිත්‍රයක් මවා හෝ මහජන කැලඹීමක් ඇති කර හෝ ආණ්ඩුව බිඳ දැමීමේ විපක්ෂයේ සිහිනයට කිසිදා ඉඩ නොතබන බවද ජනාධිපතිවරයා මෙහිදී අවධාරණය කළේය.
වත්මන් රජය අශිෂ්ටත්වයේ යුගය අවසන් කර, ශිෂ්ටත්වයේ මාර්ගය සකස් කර ඇති බවත්, හැකි නම් වත්මන් රජයේ ශිෂ්ටත්වය අබිබවා යන ලෙසත් ජනාධිපතිවරයා විපක්ෂයට අභියෝග කළේය.
එසේ නොමැතිව පැරණි දේශපාලනයේ සිටීමෙන් දේශපාලන ෆොසිල බවට පත්වීම වැළැක්විය නොහැකි බවද ජනාධිපතිවරයා අවධාරණය කළේය.
යටිබිම්ගත අපරාධ රාජ්‍යයේ අපරාධ කල්ලිවලට වත්මන් ආණ්ඩුවේ කිසිදු මන්ත්‍රීවරයෙකුගෙන් ආශිර්වාදයක් නොලැබෙන බවද ජනාධිපතිවරයා පැවසීය.
” ශ්‍රී ලංකා හමුදාව සහ පොලිසිය වෘත්තීමයභාවයක් ඇති හමුදාවක් සහ පොලීසියක් බවට පත් කරනවා”
ශ්‍රී ලංකා හමුදාව සහ පොලිසිය වෘත්තීමයභාවයක් ඇති හමුදාවක් සහ පොලීසියක් බවට පත් කරන බව පැවසු ජනාධිපතිවරයා ආරක්ෂක අංශයේ කිසිදු පත්වීමක් හෝ ස්ථාන මාරුවක් හිතවත්කම් මත හෝ දේශපාලනිකව සිදු කර නොමැති බවද සඳහන් කළේය.
හිටපු ආරක්ෂක මාණ්ඩලික ප්‍රධානියාට සේවා දිගු හතක් ලබා දී ඇති බවත්, හිතවතුන්ට හෝ මිතුරන්ට ලබාදෙන පත්වීම් සමග අලුත් ගමනක් යා නොහැකි බැවින් නව පත්වීම් සිදු කර තිබෙන බව ජනාධිපති අනුර කුමාර දිසානායක කියා සිටියේය.
පුද්ගලයාට පක්ෂපාතී හමුදාවක් වෙනුවට රාජ්‍යයට පක්ෂපාතී හමුදාවක් නිර්මාණය කිරීමටත් එම හමුදාවේ වෘත්තිමයභාවය වැඩිදියුණු කිරීමටත් වත්මන් රජය කටයුතු කරන බව ජනාධිපතිවරයා අවධාරණය කළේය.
කාලයේ වැලිතලාවෙන් යට වී තිබෙන අපරාධවලට යුක්තිය සහ සාධාරණය ඉටු කිරීමට වත්මන් රජය කටයුතු කරන බවත්, ඒ සඳහා ගත හැකි සෑම ක්‍රියාමාර්ගයක්ම ගන්නා බවත් ජනාධිපති අනුර දිසානායක පැවසීය.
ආරක්ෂක ක්ෂේත්‍රයේ ව්‍යුහයේ විශ්වාසය මත ශිෂ්ටත්වය ගොඩනැගෙන බවද සඳහන් කළ ජනාධිපතිවරයා, අශිෂ්ටත්වයේ පතුලටම ගොස් තිබෙන මෙම රාජ්‍ය නැවත ශිෂ්ටත්වය කරා ගෙන යාමට වත්මන් රජය කටයුතු කරන බවද සඳහන් කළේය.
ආර්ථික අර්බුදයක් ඇති කර බලය ලබා ගැනීමේ විපක්ෂයේ සිහිනය මේ වන විට අවසන් වී ඇති බව පෙන්වා දුන් ජනාධිපතිවරයා, ජාතික ආරක්ෂාව පිළිබඳ අර්බුදයක් මවා පාමින් ආණ්ඩු බලය ලබා ගැනීමට විපක්ෂය දැන් යම් උත්සාහයක සිටින්නේද යන්න සැක සහිත බවද සදහන් කළේය .
”අපරාධ කල්ලි කිහිපයක් එකම අවස්ථාවක ක්‍රියාත්මක වීම කුමන්ත්‍රණයක්දැයි සැක සහිතයි”
මෙම මාසයේදී සිදු වූ අපරාධ පහ පිළිබඳ විමර්ශනය කරන විට එය අපරාධ කල්ලි පහකින් සිදුව තිබෙන බවත් පරීක්ෂණ සිදු වන විට තම දිශාවට පරීක්ෂණ යොමු වන බව අපරාධකරුවන් හඳුනා ගන්නා බවත්, එම අපරාධ කල්ලි කිහිපයක් එකම අවස්ථාවක ක්‍රියාත්මකවීම කුමන්ත්‍රණයක්දැයි සැකයක් පවතින බවත් ජනාධිපතිවරයා හෙළි කළේය.
මෙම කුමන්ත්‍රණ හඳුනා ගනිමින් ඒවා මර්දනයට රජය පියවර ගන්නා බවද ජනාධිපතිවරයා පැවසීය.
කුමන්ත්‍රණවලින් ආණ්ඩු බලය හුවමාරු කළ යුගය අවසන් බවත්, ශිෂ්ටත්වය මතින් ආණ්ඩුවක් නිර්මාණය කළ හැකි බවත් ජනාධිපති අනුර කුමාර දිසානායක පැවසීය.
රාජ්‍ය ආයතන සහ දේශපාලන අධිකාරිය අපරාධ කල්ලිවලින් වියුක්ත කරන සමාජයක් ගොඩනගන බවද ජනාධිපතිවරයා වැඩිදුරටත් සඳහන් කළේය.
ආරක්ෂක අංශවලට විදේශ පුහුණුව සඳහා ලබා දෙන දීමනා වැඩි කිරීමට මෙවර අයවැය මගින් යෝජනා කර තිබේ. ගුවන් හමුදාවට හා නාවික හමුදාවට අවශ්‍ය යානා මිලදී ගැනීම සඳහා අයවැය මගින් ප්‍රතිපාදන වෙන්කර ඇති අතර පොලිස් දෙපාර්තමේන්තුවට පහසුකම් ලබා දීමට රුපියල් මිලියන 1000ක් වෙන් කිරීමට සැලසුම් කර ඇති බවද ජනාධිපතිවරයා කියා සිටියේය.
ත්‍රිවිධ හමුදාවට සහ පොලිසියට නව බඳවා ගැනීම් සඳහා මුදල් වෙන් කර ඇති බවත් ගුවන් හමුදාවට සහ පොලිසියට 10,000 බැගින් බඳවා ගැනීමට මෙවර අයවැයෙන් මුදල් වෙන් කර තිබෙන බවත් ජනාධිපතිවරයා සඳහන් කළේය.
theleader.lk
