ATMවලට දාන්න ගෙනගිය කෝටි හතහමාරක් රැගෙන රියැදුරා පැන ගිහින්
- 5opn1
- November 19, 2024
- බැංකු සහ මූල්‍ය
- ATMවලට දාන්න ගෙනගිය කෝටි හතහමාරක් රැගෙන රියැදුරා පැන ගිහින්
- 0 Comments
බැංකුවල ටෙලර් යන්ත්‍රයන්ට මුදල් තැන්පත් කරන සහ ටෙලර් යන්ත්‍රවල ගනුදෙනුකරුවන් තැන්පත් කරන මුදල් රැස්කරන පුද්ගලික සමාගමක රියදුරකු ඊයේ(18) බැංකුවල තැන්පත් කිරීමට රැගෙන යමින් තිබූ රුපියල් කෝටි හතහමාරක් රැගෙන වෑන් රථයකින් පලා ගොස් ඇත.
අදාළ සමාගමේ සීදුවේ පිහිටි ශාඛාවේ සිට බැංකුවල ටෙලර් යන්ත්‍රවලට මුදල් තැන්පත් කරමින් යමින් සිටිය දී ආරක්ෂකයන් මඟහැර මෙම මුදල් තොගයද රැගෙන රියදුරා පලා ගොස් ඇතැයි පොලිසිය සඳහන් කරයි. සීදුවේ සිට බැංකු තුනක ටෙලර් යන්ත්‍රවලට මුදල් තැන්පත් කර එහි මුදල් තැන්පත් කරන යන්ත්‍රවල යන්ත්‍රවල එක්රැස්ව තිබූ මුදල්ද රැගෙන මිනුවන්ගොඩ පිහිටි බැංකුවක ටෙලර් යන්ත්‍රයකට මුදල් තැන්පත් කිරීමට ගිය අවස්ථාවේ දී මෙම සොරකම සිදුව තිබේ.
මිනුවන්ගොඩදී බැංකුවක ටෙලර් යන්ත්‍රයකට මුදල් තැන්පත් කිරීම සඳහා ආරක්ෂකයන් ටෙලර් යන්ත්‍රයේ තැන්පත් කරන මුදල් බහා තිබූ තැටිය රැගෙන කුඩා වෑන් රථයෙන් බැස බැංකුවේ ටෙලර් යන්ත්‍රය වෙත ගමන් කරන අවස්ථාවේ දී මෙම සොරකම සිදුව ඇති බව ගම්පහ කොට්ඨාසය භාර පොලිස් ප්‍රධානී ජේෂ්ඨ පොලිස් අධිකාරි ජගත් රෝහණ මහතා සඳහන් කළේය.
මෙම සොරකම ඊයේ උදෑසන කාලයේ සිදුව ඇත. පොලිසිය විසින් සිදුකළ සෝදිසි මෙහෙයුමක දී මුදල් රැගෙන රියදුරු පලා ගිය වාහනය ගම්පහ ගල්බොඩ ප්‍රදේශයේ අතහැර ගොස් තිබිය දී හමුවී ඇතැයි පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දුව මහතා සඳහන් කළේය.
මෙම සොරකම සම්බන්ධයෙන් පොලිස් මාධ්‍ය කොට්ඨාසය විසින් සැකකාර රියදුරගේ ඡායාරූපයක්ද ඊයේ රාත්‍රී කාලයේ මාධ්‍යයට නිකුත් කරනු ලැබීය. මෙම පුද්ගලයා සම්බන්ධයෙන් යම් තොරතුරක් වෙතොත් ගම්පහ කොට්ඨාසයභාර ජ්‍යෙෂ්ඨ පොලිස් අධිකාරීවරයාගේ 0718591608 දුරකථන අංකයට හෝ ගම්පහ දිස්ත්‍රික් ජ්‍යෙෂ්ඨ පොලිස් අධිකාරීවරයාගේ 071859 1610 දුරකථන අංකයට තොරතුරු ලබාදෙන ලෙස පොලිස් මාධ්‍ය කොට්ඨාසය මහජනතාවගේ ඉල්ලා සිටි.
මෙම සැකකරු කටාන ප්‍රදේශයේ පදිංචිකරුවෙක් වන අතර වසර දෙකක පමණ කාලයක් මෙම සමාගමේ කාගෙත් විශ්වාසය දිනාගෙන සේවය කර ඇති අයෙක් බව ද විමර්ශනවලින් පෙනී ගොස් තිබේ.
මෙම සොරකම සම්බන්ධයෙන් ගම්පහ කොට්ඨාස අපරාධ විමර්ශන කාර්යාංශය විමර්ශන පවත්වනු ලබයි.
ගයාන් කුමාර වීරසිංහ
