පළමු කාර්තුවේම බිලියන 61ක දැවැන්ත සුරාබදු ආදායමක්
- CNL Reporter
- April 8, 2025
- ව්‍යාපාරික පුවත්
- සුරාබදු
- 0 Comments
මත්පැන් මත අයකරන සුරාබදු ආදායම මේ වසරේ පළමු කාර්තුවේදීම සැලකිය යුතු ලෙස වර්ධනය වී තිබේ.
ඒ අනුව 2025 පළමු කාර්තුව සඳහා රුපියල් බිලියන 61 ක දැවැන්ත සුරාබදු ආදායමක් වාර්තා කිරීමට හැකි වූ බව සුරාබදු කොමසාරිස් ජනරාල් උදයකුමාර පෙරේරා මහතා සඳහන් කරයි.
සුරාබදු දෙපාර්තමේන්තුව 2025 වසර සඳහා රුපියල් බිලියන 242 ක ආදායම් ඉලක්කයක් ලබාගැනීමේ අරමුණින් දීපව්‍යාප්තව නව සැලැස්මක් සකස් කරන ලදී. ඒ අනුව වසරේ පළමු කාර්තුව සඳහා ඉලක්කය රුපියල් බිලියන 42ක් වූ අතර එම අගය අභිබවා යමින් රුපියල් බිලියන 61 ක ආදායමක් ලබා ගැනීමට හැකිවී තිබේ.
මේ වසරේ සුරාබදු ආදායම් ඉලක්ක සපුරා ගැනීම වෙනුවෙන් ප්‍රධාන වශයෙන් කරුණු කිහිපයක් වෙත අවධානය යොමු කළ බව සුරාබදු කොමසාරිස් ජනරාල්වරයා පවසයි. ඉන් ප්‍රධාන කරුණ වන්නේ නීති විරෝධී මත්පැන් සඳහා වන වැටලීම් වැඩි කිරීමයි.
මෙරට නීති විරෝධී මත්පැන් ජාවාරම් ක්‍රියාත්මක වීම කලක් තිස්සේ පැවැති ගැටලුවක් වූ බැවින් ඊට නිසි පිළියම් යෙදීම මෙවර වැඩසටහනේදී වඩාත් අවධානයට ලක් වූ කරුණක් විය. මීට අමතරව බදු නොගෙවා වෙළෙඳපොළට මත්පැන් පැමිණීම ද වැළැක්වීම සඳහා දැනට පවතින ආරක්ෂණ ක්‍රියාවලි තවදුරටත් දැඩි කිරීමට අවධානය යොමුකර තිබේ. නිෂ්පාදන දිනය සහ හඳුනාගැනීමේ සංකේත හඳුන්වාදීම ක්‍රියාත්මක කර ඇත්තේ ඒ යටතේයි.
කලක් තිස්සේ මෙරට බදු සංශෝධනය වී නොතිබූ බැවින් එලෙස එකතු නොවූ බදු නැවත සලකා බැලීමත් ඒ හරහා අමතර බදු ආදායමක් ළඟාකර ගැනීමද මෙවර සාර්ථක ප්‍රතිඵල ලබා දී ඇති පියවරකි. සුරාබදු කොමසාරිස් ජනරාල් උදය කුමාර පෙරේරා මහතා පවසන්නේ මෙම කටයුතු වෙනුවෙන් නිලධාරීන් දිරිමත් කිරීම සහ නව දැනුම මෙන්ම තාක්ෂණික පහසුකම් ද ලබා දීමේ වැදගත්කම හඳුනාගත් බවයි. ඒ අනුව මෙවර සුරාබදු දෙපාර්තමේන්තුවේ වාර්ෂික සැලැස්ම ක්‍රියාත්මක කිරීමේදී ඒ සඳහාද වැඩි අවධානයක් යොමුකර සාර්ථක ප්‍රතිඵල ලබාගෙන තිබේ.
වඩාත් කාර්යක්ෂම සේවාවක් ලබාගැනීමටත්, දූෂණ අවම කිරීමටත් හැකිවන පරිදි රජයේ තොරතුරු තාක්ෂණ සහ ඩිජිටල්කරණ වැඩපිළිවෙළට සමගාමීව ඍ්ඵී පද්ධතිය හඳුන්වා දීමද මෙම සාර්ථකත්වයේ පදනමක් වූ බව සුරාබදු කොමසාරිස් ජනරාල්වරයා පෙන්වා දෙයි. මෙම සාර්ථක ප්‍රතිඵල ලබාගත් විධිමත් වැඩපිළිවෙළ වසර පුරා ක්‍රියාත්මක කිරීම වැදගත් බවද ඔහු අවධාරණය කළේය.
එමෙන්ම මෙම සැලසුම ක්‍රියාත්මක කිරීම අඩාළ කිරීමට සංවිධානාත්මක කණ්ඩායම් විවිධාකාරයෙන් කටයුතු කරන බවත් ඔහු පෙන්වා දෙයි. නමුත් එම බාධා කිරීම් සඳහා දේශපාලන අධිකාරියෙන් කිසිදු සහායක් හිමි නොවන බැවින් මෙම වැඩපිළිවෙළ තුළ වසරේ ඉලක්ක සපුරා ගතහැකි බවට සුරාබදු කොමසාරිස් ජනරාල්වරයා දැඩි විශ්වාසය පළ කරයි.
