පළාත් පාලන ආයතනවල බලය පාරට ගෙන ආ යුතුයි – මහින්ද දේශප්‍රිය
- Sujeewa Senerath
- March 31, 2025
- දේශපාලන, පුවත්
- election, election commission, mahinda deshapriya
- 0 Comments
ඡන්දය යනු කැමැත්ත බවත්, කැමැත්ත අනුව තේරීමක් කරන සෑම අවස්ථාවකදීම ප්‍රචණ්ඩත්වය ඇති වන බවත් ජාතික මැතිවරණ කොමිෂන් සභාවේ හිටපු සභාපති මහින්ද දේශප්‍රිය මහතා පෙන්වා දුන්නේ ය. ඔහු වැඩි දුරටත් පෙන්වා දුන්නේ ප්‍රචණ්ඩත්වය ඇතිවීමට එකම කරුණ දේශපාලනය නොවන බවයි. බලයට කවුරුත් කැමතියි. මහින්ද දේශප්‍රිය මහතා අවධාරණය කළේය.
පළාත් පාලන මැතිවරණ ඉතිහාසය පුරා යම් පමණකට ප්‍රචණ්ඩත්වය පැවැති බව පෙන්වා දුන් මහින්ද දේශප්‍රිය මහතා එහි උච්චතම අවස්ථාව 1997 පළාත් පාලන මැතිවරණය බව පෙන්වා දුන්නේ ය.
“අපේ අවාසනාවට මේ ගැන වාර්තා නැහැ. නමුත් ඒවා කළ සියලුම දෙනා දන්නවා කොතරම් නරක ලෙස ඒක සිද්ධ වුණාද කියලාමහින්ද දේශප්‍රිය කීවේය.
පසුගිය කාලය තුළ පැවැති සියලුම මැතිවරණවලදී මනුෂ්‍ය ඝාතනයක් හෝ සිදු වුණ බව සිහිපත් කළ මහින්ද දේශප්‍රිය මහතා එකී සංස්කෘතියට තිත තැබීම සිදු වුණේ 2015 අගෝස්තු මහ මැතිවරණයෙන් පසුව බව ද සඳහන් කළේය.
මැතිවරණ ප්‍රචණ්ඩත්වය භූමිය තුළ සිදු නොවූව ද සමාජ මාධ්‍ය හා සයිබර් අවකාශය තුළ දැඩි මැතිවරණ ප්‍රචණ්ඩත්වයක් සිදුවන බවත් ඇතැම් සිදුවීම් නින්දිත හා ජුගුප්සාජනක බවත් මෙහිදී මහින්ද දේශප්‍රිය මහතා ආසන්න උදාහරණ ඇසුරින් පෙන්වා දුන්නේය.
මැතිවරණයක් පැවැත්වීමේ සමස්ත වගකීම මැතිවරණ කොමිෂන් සභාව සතු වුවත් පුරවැසියන්ට ද, ඡන්ද හිමියන්ට හා ඡන්දදායකයින්ට ද එහිදී අත්හැරිය නොහැකි වගකීමක් තිබේ. ඔවුන් එම වගකීම නොදරනතාක් කල් නිදහස් හා සාමකාමී ඡන්ද විමසීමක් පැවැත්වීම අභියෝගාත්මක ය.
කොට්ඨාශ ක්‍රමය නිසි පරිදි ක්‍රියාත්මක වීමට නම් දේශපාලනයෙන් ස්වාධීන අපේක්ෂකත්වයක් ප්‍රවර්ධනය කළ යුතු බව පෙන්වා දුන් මහින්ද දේශප්‍රිය මහතා සමානුපාතික ක්‍රමය ක්‍රියාත්මක වීමට නම් දේශපාලන පක්ෂ ක්‍රමය ක්‍රියාත්මක විය යුතු බව පෙන්වා දුන්නේය.
ස්වාධීන කරන්න පුළුවන් ද ?
මේක ස්වාධීන කරන්න පුළුවන් ද ? බැහැ. ඒක කරන්න බැහැ. හේතුව දන්නවාද ? 1956දී ආචාර්ය ඇන්.ඇම්. පෙරේරා කොළඹ මහ නගර සභාවේ නගරාධිපති වුණේ ලංකා සම සමාජ පක්ෂයෙන්. ඒ මීට අවුරුදු 70තට පමණ පෙර. ඊට පස්සේ ස්වාධීන අපේක්ෂකයෝ කියන අදහස නිර්වාණය වාගේ ඉතාම යහපත් හා පරිපූර්ණ අදහසක්. ඒත් ඒක ඉටුකර ගන්න බැහැ. පරිපූර්ණ කර ගන්න බැහැ. අකමැත්තෙන් හරි මේ පක්ෂ ක්‍රමයත් එක්ක දුවන්න වෙනවා මහින්ද දේශප්‍රිය මහතා තව දුරටත් කරුණු පැහැදිලි කරමින් සඳහන් කළේය.
වර්තමානය තුළ විශාල දේශපාලන බල අරගලයක් තිබේ. නමුත් දේශපාලනය බලය තහවුරු කර ගැනීමට පළාත් සභාව මෙන්ම පළාත් පාලන ආයතන ද ජයග්‍රහණය කළ යුතුව තිබේ. මෙය ආණ්ඩුව මෙන්ම විපක්ෂය ද මුහුණ දෙන අභියෝගයකි. නමුත් වත්මන් මැතිවරණය ක්‍රමය තුළ 50%ක ආසන ප්‍රමාණයක් ජයග්‍රහණය කිරීමකින් තොරව අදාළ පළාත් පාලන ආයතනයේ බලය පිහිටුවීමට අවස්ථාවක් නොලැබේ. ඒ අනුව වත්මන් විපක්ෂය මැතිවරණයෙන් පසුව එක් වුවහොත් පළාත් පාලන ආයතනවල බලය පිහිටුවීමේ දී වත්මන් ආණ්ඩුවට ප්‍රබල අභියෝගයක් එල්ල කළ හැකිය. එවැනි අවදානමක් මේ වන විට තිබේ.
“ආණ්ඩුව බලන්නේ කොහොම හරි බහුතර බලයක් දිනා ගන්න. විපක්ෂය බලන්නේ කෑලි කෑලි එක්කර ගෙන බලය අල්ල ගන්න. මේ ප්‍රශ්නයේ දී බල අරගලයක් තිබෙනවා මයි. මේ තත්ත්වය තුළ අපි ඉදිරියට, ඔබ්බට යන්නේ කොහොමද ? මේ ගැන මගේ අදහස, අරගලය අවස්ථාවේ ආව ස්ලෝගන් එක, බලය දියවන්නාවෙන් ඔබ්බට කියන එක.
මෙහිදී මහින්ද දේශප්‍රිය මහතා තමා විශ්වවිද්‍යාලයේ සිටි යුගයේදී සමාජගතව තිබූ සටන් පාඨයක් යළි සිහිපත් කළේය, පාර්ලිමේන්තුව,පාර්ලිමේන්තුව, කතා සාප්පුව. දිනවමු දිනවමු ජනතා සභාව.
අපි ඇයි එහෙම කිව්වේ, බලය පාර්ලිමේන්තුවෙන් එළියට ගේන්න. පසුගිය අරගලයේදී ඒක යළිත් ආවා, බලය දියවන්නාවෙන් එළියට කියලා. ඒක ගෙනාපු පක්ෂය නොවෙයි වැදගත්, සංකල්පය තමයි වැදගත්. සභාවේ නම මොකක් වුණත් ඒකේ බලය ගොඩනැගිල්ලෙන් එළියට යා යුතුයි. අම්බලන්ගොඩ නගර සභාවේ බලය ඒ ගොඩනැගිල්ලන් එළියට යා යුතුයි. පළාත් පාලන ආයතන පාරට පැමිණිය යුතුයි මහින්ද දේශප්‍රිය මහතා අවධාරණය කළේය.
මෙහිදී මහින්ද දේශප්‍රිය මහතා යළි අවධාරණය කළේ කොට්ඨාශයේ මන්ත්‍රීවරයා ද පාරට පැමිණිය යුතු බවයි. ඔහුගේ වගකීම විය යුත්තේ තමාගේ කොට්ඨාශයේ ජනතාවගේ ජීවන තත්ත්වය උසස් කිරීම, පරිසරය ආරක්ෂා කිරීම, සංස්කෘතිය හා සමාජයීය දියුණු ඇති කිරීම ආදිය බවත් මහින්ද දේශප්‍රිය මහතා පෙන්වා දුන්නේය.
මොන පළාත් පාලන ආයතනය ද ගමකට වේදිකා නාට්‍යක් ගේන්නේ, පොත් ප්‍රදර්ශනයක් ගේන්නේ. ගමට වේදිකා නාට්‍යයක්, පොත් ප්‍රදර්ශනයක් ගේන තැනකට පළාත් පාලන ආයතන පත් කළ යුතුයි. මේ ඡන්දයෙන් පස්සේ මෙන්න මේ තැනට පළාත් පාලන ආයතන පත් කළ යුතුයි. ඔහු යළිත් පෙන්වා දුන්නේ ය.
පළාත් පාලන ආයතන බල අරගලයෙන් ඔබ්බට ගෙන යාමට නම් ජනතාවගේ අවිධිමත් සමාජ සංවිධාන බිහි කළ යුතු බව පෙන්වා දුන් මහින්ද දේශප්‍රිය මහතා ඒ මුදල් නොගෙවන, ඔවුන්ගේ අතින් මුදල් ගෙවන සංස්කෘතියක් තුළ යැයි ද කීවේය.
(සාධාරණ සමාජයක් සඳහා වන ජාතික ව්‍යාපාරය සිය ‘කතිකාව’ සංවාද මාලාවේ ‘බල අරගලයෙන් ඔබ්බට – පළාත් පාලන මැතිවරණයේ දී අපේක්ෂා කරන වගවීම’යන තේමාව යටතේ පවත්වනු ලැබූ සංවාදය ඇසුරින් තුෂාල් විතානගේ විසින් සම්පාදිත සංෂිප්ත ලිපියකි.)
