මහින්දගේ විජේරාමයේ නිවස නඩත්තුවට මේ වන විට කෝටි 4ක් වැය කරලා – ඇමැති නලින්ද මැතිසබයේදී කියයි
- 5opn1
- January 24, 2025
- දේශපාලන
- මහින්දගේ විජේරාමයේ නිවස
- 0 Comments
විශ්‍රාමික ජනාධිපති මහින්ද රාජපක්ෂ මහතා ජීවත් වන කොළඹ 07 විජේරාම නිවස නඩත්තු කිරීම සඳහා මේ වන විට රුපියල් ලක්ෂ 430ක් (හාරසිය තිස් ලක්ෂ තිස් නව දහස් නවසිය හැට නවයක්) වැය කර ඇතැයි ආණ්ඩු පක්ෂයේ ප්‍රධාන සංවිධායක සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස මහතා පාර්ලිමේන්තුවේදී ඊයේ (23දා) පැවසීය.
එම නිවස අලුත්වැඩියා කිරීම සඳහා 2020 වසරේදී රුපියල් තිස්තුන්ලක්ෂ අසූදෙදහස් අටසිය අනූ දෙකක්, 2022දී තුන් ලක්ෂ අනූපන්දහසක්, 2023දී මිලියන 18.336ක් වැය කර ඇතැයිද නිවස සඳහා එක්ස්කැවේටරයක් (විදුලි පඩිපෙළක්) සවි කිරීම සඳහා රුපියල් ලක්ෂ 150.9ක් සහ ජෙනරේටරයක් මිලදී ගැනීම සඳහා රුපියල් හතළිස් අටලක්ෂ අසූපන්දහස් අටසිය හතළිස් තුනක් ද වැය කර ඇතැයි ඇමැතිවරයා කීය.
2023 වසරේදී පමණක් එම නිල නිවස නඩත්තු කිරීමට රුපියල් ලක්ෂ 383ක් වියදම් කර ඇති අතර 2024දීත් රුපියල් නව ලක්ෂ හතලිස් හයදහසක් වියදම් කර ඇතැයිද ඔහු කියා සිටියේය.
හිටපු ඇමැති ලක්ෂ්මන් කදිරගාමර් මහතා පදිංචි වී සිටි එම නිවස ඊට පසුව අක්කර එකයි පර්චස් දහතුනක් දක්වා විශාල කරගෙන ඇති අතර එහි රජයේ තක්සේරු වටිනාකම රුපියල් මිලියන 3127.84 ක් බවද හෙතෙම සඳහන් කළේය. නිවස වර්ග අඩි තිස්දහස් පන්සිය තිස්හතරකින් යුතු බවත් මෙම නිවසේ මාසික කුලිය රුපියල් ලක්ෂ 46 ක් ලෙස තක්සේරු තර තිබෙන බවත් ඇමැතිවරයා කීය.
අකිත පෙරේරා
