මිලියන 40000ක ටින් මාළු රටින් ගෙනත්
- 5opn1
- December 29, 2024
- ව්‍යාපාරික පුවත්
- මිලියන 40000ක ටින් මාළු රටින් ගෙනත්
- 0 Comments
මෙරටට ටින් මාළු ආනයනය කිරීම සඳහා පසුගිය වසර පහයි මාස අටක කාලයේ දී (2019 සිට 2024 අගෝස්තු දක්වා) රුපියල් මිලියන හතළිස්දහස්, අටසිය අනූපහයි දශම තුනක මුදලක් (40,895.3) වැය කර ඇති බැව් ධීවර හා ජලජ සම්පත් අමාත්‍යාංශය මගින් නිකුත් කර ඇති වාර්තාවක සඳහන් වෙයි.
2023 වර්ෂයේ ටින් මාළු ආනයනය කිරීම සඳහා වැය කර ඇති මුදල රුපියල් මිලියන 6172.6කි. මෙම වර්ෂයේ ජනවාරි මස සිට අගෝස්තු මස දක්වා කාලයේ දී ටින් මාළු ආනයනය කිරීම සඳහා රුපියල් මිලියන 2744.8ක මුදලක් වැය කර තිබුණි.
මත්ස්‍ය සම්පතින් ගහන වර්ග කි.මී. 517,000 සාගර සම්පතක් තිබිය දී ටින් මාළු ආනයනය කිරීම සඳහා මේ අයුරින් විශාල මුදලක් වැය කිරීම අනුමත කළ නොහැකි බව ධීවරයෝ පවසති. ටින් මාළු ආනයනය සීමා කිරීමට කටයුතු කළයුතු බව ද ධීවරයෝ පෙන්වා දෙති.
මත්ස්‍ය ආනයනය කිරීම මේ වනවි ට සීමා කර ඇති බවත් මත්ස්‍ය සහ ඒ ආශ්‍රිත නිෂ්පාදන ආනයනය කිරීම ක්‍රමානුකූලව අඩු කර අනාගතයේ දී එය සම්පූර්ණයෙන් නතර කිරීමට අවශ්‍ය කටයුතු සිදුකරන බවත් ධීවර ජලජ හා සාගර සම්පත් නියෝජ්‍ය ඇමැති රත්න ගමගේ මහතාගෙන් මේ පිළිබඳව අප කළ විමසුමක දී සඳහන් කළේය.
ටින් මාළු ආනයනය කිරීමට ඉදිරියේ දී බලපත්‍ර ලබා නොදෙන බවත් දේශීය ටින් මාළු කර්මාන්තකරුවන් නඟාසිටුවීම සඳහා අවශ්‍ය සහයෝගය ලබා දෙන බවත් ටින් මාළු සඳහා පනවා ඇති වැට් බද්ද පිළිබඳ මුදල් අමාත්‍යාංශය සමග සාකච්ඡා කිරීමට බලාපොරොත්තු වෙන බවත් නියෝජ්‍ය ඇමැතිවරයා වැඩිදුරටත් සඳහන් කළේය.
ලලිත් චාමින්ද
