හොර බ්‍රිගේඩියර් ඇතුළු අටේ කල්ලිය අල්ලයි
- 5opn1
- November 25, 2024
- දේශපාලන
- හොර බ්‍රිගේඩියර් ඇතුළු අටේ කල්ලිය අල්ලයි
- 0 Comments
පොළොන්නරුව වැලිකන්ද පොලිසිය හමුදා විනය නිලධාරීන්ගේ සහාය ඇතිව එම ප්‍රදේශයේ කළ මෙහෙයුමක දී හොර බි්‍රගේඩියර්වරයකු සහ හමුදා භටයන් දෙදෙනකු ඇතුළු අට දෙනකු මෝටර් රථ හතරක් සමග අත්අඩංගුවට ගෙන ඇත.
මෙම හොර බි්‍රගේඩියර්වරයා ළඟ තිබූ නිල ඇඳුම් මෙන්ම “බි්‍රගේඩියර්වරයා” යනුවෙන් සකස් කරන ලද හොර හැඳුනුම්පතක් ද පොලිසිය මගින් සොයාගෙන තිබේ.
මෙම ප්‍රධාන සැකකරු කලක් හමුදාවේ සේවයකර තිබේ. හමුදා සෙබළුන් දෙදෙනා ත්‍රිකුණාමලය ප්‍රදේශයේ කඳවුරක සේවය කරන බව හෙළි වී ඇත.
මොවුන් ළඟ වැගන් ආර් වාහන තුනක් ද කැබ් රථයක් ද තිබී ඇතැයි වැටලීම සිදු කළ පොලිස් ප්‍රකාශකයෙක් පැවැසීය.
සැක සහිත පිරිසක් මෙම ප්‍රදේශයේ ගැවසෙන බවට ලැබුණු තොරතුරු ඔස්සේ ක්‍රියාත්මක වූ පොලිස් නිලධාරීන් හමුදා විනය නිලධාරීන්ගේ සහාය ඇතිව මෙම වැටලීම සිදුකර තිබේ.
මෙම බි්‍රගේඩියර් නිල ඇඳුම සැකකරු අතට ලැබුණු ආකාරය සහ හැඳුනුම්පත සකස් කළ ආකාරය පිළිබඳව පොලිස් විමර්ශන ආරම්භ කර ඇත.
මෙම හොර බි්‍රගේඩියර්වරයා ඇතුළු කල්ලිය කුමන අරමුණකින් මෙසේ සැක කටයුතු ලෙස ගැවසුණේ ද යන්න ගැන සහ මෙම හොර බි්‍රගේඩියර්වරයාට අනෙකුත් හමුදාවේ දෙදෙනාගේ ඇති සම්බන්ධය කුමක් ද යන්න සොයා පොළොන්නරුව ජ්‍යෙෂ්ඨ පොලිස් අධිකාරි නිශාන්ත ද සිල්වා මහතාගේ ප්‍රධානත්වයෙන් පරීක්‍ෂණ පැවැත්වෙයි.
නෝමන් පලිහවඩන
